అన్నిటికీ అవుననాలా?

''అందరితో కలిసి జీవించాలంటే అన్నిటికీ అవుననాలా? తప్పదా? అనేది ప్రశ్న. కాదు... అలా అవసరం లేదు. ''డెసిడెరాటా'' ఏమంటోందో వినండి....
"As far as possible without surrender, be on good terms with all persons. Speak your truth quietly and clearly; and listen to others, even to the dull and the ignorant; they too have their story Avoid loud and aggressive persons; they are vexations to the spirit"

సాధ్యమైనంత వరకు ఎవరికీ లొంగకుండా, అందరితో మంచి సంబంధాలు కలిగి ఉండండి. మీరెరిగిన సత్యాన్ని ప్రశాంతంగా, స్పష్టంగా చెప్పండి.  అజ్ఞానుల, మూర్ఖుల మాటలు కూడా వినండి. వారు చెప్పుకునే కథలు కూడా ఉంటాయి. పెద్ద గొంతుతో ఉద్రేకంగా వాదించేవారిని దూరంగా ఉంచండి. వారు మీ మనస్సును చెదరగొట్టగలరు.


సూటిగా సాగిపో :
వ్యక్తిత్వాలను పణంగా పెట్టి తానుసాగే పథాన్ని విడిచిపెట్టి, తాను నమ్మిన విధి విధానాన్ని బలిపెట్టి ఎదుటి వారి మాట వినకపోతే వారేం చేస్తారో అనే భయం చేతనో లేక, నేను వారి నుండి పొందుతున్న సౌకర్యాన్ని సేవను కోల్పోతానేమో అనే లోభం చేత వారికి లొంగిపోయే జీవన విధానం సరి అయినది కాదు. ప్రస్తుతం జీవితంలో ఈ విధానం వల్ల జీవితం  సుఖవంతమైనప్పటికీ అది సుదీర్ఘ కాలంలో బానిస బ్రతుకుగా మారి మానసికమైన అస్థిరత్వాన్ని
కలిగిస్తుంది. ''ధైర్యంగా ఉన్నవాడు ధనవంతుడు, ధైర్యంలేనివాడు బీదవాడు' అంటుంది
అమ్మ. ధనవంతులుగా బ్రతకండి.


నేర్చుకోండి :
చాలామంది నాకు నేర్పడానికే నా దగ్గరికి వస్తుంటారుగాని నేర్చుకోవడానికి కాదు. (పైకి మాత్రం నేర్చుకోవడానికే వస్తున్నట్లు చెబుతారనుకోండి). ఎంతో దూరంనుండి శ్రమకోర్చి, డబ్బు ఖర్చుపెట్టుకొని వచ్చి మనకు నేర్పేవారు ఎంత కరుణామయులు. వారు కూడా ఒక జీవితం గడిపారు. వారికీ అనుభవాలున్నాయి; వార అనుభవసారాన్ని చిన్న మాటల్లో మనకు అందించడానికి వచ్చారు. గాలి వెలుతురు కావాలి అని కోరుకునేవారు ఇంటికి తలుపులు కిటికీలు తెరిచి ఉంచాలి;  అలాగే నలుగురిలో కలిసి జీవించదలచిన వాడు ఇతరుల నుండి నేర్చుకోదలచిన వాడు, ఇతరులు చెప్పేది ఓపికగా వినడానికి సిద్ధంగా ఉండాలి.

తప్పుకోండి :
ఒక్కొక్కసారి ఆ చెప్పేవారి మాటలో వారి దంభాహంకార ప్రదర్శన, స్వసామర్ధ్య ప్రదర్శన మాత్రమే ఉండి పనికి వచ్చేది. ఏమీ లేకపోయినా లేక తలాతోక లేని వాగుడు ఉన్నా ్బడా, వారితో కలిసి జీవించదలచినవారు ఓపికగా వారి మాటను వినాలి. వారి గొంతు యొక్క స్థాయి, ఉద్రేకము పెరుగుతున్నాయి అనుకున్నప్పుడు మాత్రం మెల్లిగా అక్కడ నుండి లేచి వెళ్ళి పోవడం మంచిది. లేదా అలా వెళ్ళిపోవడం అనే కార్యం వారిని అవమానించి నట్లవుతుంది
అనుకున్నప్పుడు, మనస్సును అక్కడినుండి తప్పించి మరోవైపుకు మళ్ళించే కళ నేర్చుకోండి.

''ఎటువంటి ప్రజ్ఞ లేనివాడి ముఖ్య లక్షణం ఏమిటో తెలుసా?.... ప్రతి విషయాన్ని ఖండించడం'' అంటాడు ''బారోష్‌షోకాల్ట్‌''. వ్యక్తులు మాట్లాడేప్పుడు వారిని జాగ్రత్తగా పరీక్షించండి. వారు ఏస్థాయికి చెందినవారో వారినుండి మీరు ఏమి నేర్చుకోవచ్చో మీకు ఇట్టే తెలిసిపోతుంది.

జాగ్రత్త :
ఇన్నిటి మధ్య "Better to keep your mouth shut and appear stupid than to open it and remove all doubt"  నోరుమూసుకొని ్బర్చోవడం వల్ల మీరు మూర్ఖులుగా కనిపించినా సరేగాని,నోరు తెరిచి వారి సందేహాలన్నీ తీర్చకండి. కానీ పరిస్థితి మిమ్మల్ని బానిసత్వం వైపు నెట్టుకు వెళుతున్నప్పుడు లేదా ఎదుటి వారి వాగుడు, మూర్ఖత్వం తారస్థాయికి చేరుకుంటు న్నప్పుడు మాత్రం, ఉద్రేకపడకుండా వారిని పక్కకు తీసుకువెళ్ళి ప్రశాంతంగా స్పష్టంగా మీరెరిగిన సత్యాన్ని చెప్పండి. దానివల్ల అక్కడి సమస్య తీరిపోవడమే గాక, భవిష్యత్తులో కొనసాగవలసిన సత్సంబంధాలు దెబ్బతినవు.